بقلمي :
ناجي الجويني الشاعر
الشعر التونسي
*** مستني رجوعها ***
حايِرْ
وهواك عليا غاير
طاير
ها القلب وخلاني وحدي ساير
****
شوڨ الهوى فــارس غلّاب
و الشّوڨ جاني وما دڨ الباب
ضيعني و ما خلّالي صـــواب
وحدي في وسط الثنايا ساير
****
وحدي نكفكف دمّي و جروحي
وحدي و يا عين ديـــما نوحــي
محبوبك سافر لشكون تبوحــي
مڨدّر علينا الشّوق و الي صاير
****
سهرت ليالي ما نوم لا تكحيلة
و النار شاعلة في الڨلب فتيلة
ضاڨ صبري وما لڨيت حيلــة
و الحال ما يڨدر عليـــه ڨــادر
****
آش كون يڨدر على فراڨ غزالو
و يحس ولّا يروف بـــحالـــــــو
وحدو يعاني المُر مِلّــي جرالـــو
يسيح دمّو و ديما عليه يكابـــر
****
تلڨاه وحــدو يبكي و ينيـــن
خليتني يا قلب ديما مسكين
نستنّى رجوعها يا لندراها وين
نلڨاها بدموعها وتلڨى حبها أماير
ليست هناك تعليقات:
إرسال تعليق