رسالة الى ... إيزيس // بقلم الاستاذ الشاعر عادل عبد الرزاق

رسالة إلى ... إيزيس
--------------------
بقلمي - عادل عبد الرازق
----------------------
إليكي يا إيزيس …
يا حبيبة قلبي الأولى
يا حبيبتي الأبدية
أكتب أغنيات العشق الأولى
على زهر اللوتس تتغنى
تحضن ورق البردي
وتبوس خد الشجرات المتضفر بعينيكي
جسدي إن اتقطع أنا روح
وبحبك وانا سالم
وبحبك وانا مجروح
أنا عايش …
من أول طيبة لممفيس
والتوقيع … : أوزوريس ”
قلبي مازال معبد متنور
بحقيقة طهرك اللي في أركاني
توصلني مراكبك شايلة سنابلك
تخضر غيطاني ف أزماني
أرسم فوق كفي عينيكي
وأعطر قلبي بسحرك يا إيزيس
قمرة وسكة وغنواية
بترفرف في سمايا وتمحي الضلمة
وأمد إيديا لقلبي أطير عصافيري
تحكيلك يا إيزيس عن مشواري
واعزف اسمك فوق أوتاري
وارسم صورتك بين أشعاري
بابدأ ترحالي من قلب عينيكي
واوصل لبيوت قلبك يا حبيبتي
جوه الحي اللي بتضحك  قناديله
أنام على صدرك واسمع غنيّوتك
يشرق فجري الأخضر
وأضفر من حلمي وليدي
نمشي أنا وهوه السكة
نرسم صورتك عالجدران
ونحط ف شعرك وردة بتضحك
رغم الأحزان
واخدك في أحضاني
وتاخديني بالأحضان
أنا لما بتتعبني دروبي
بانزل بحر عينيكي اتعّمد
وأصلي في محراب صدرك
وابدأ وانهي صلاتي
يا حبيبتي بإسمك
واكتب كلمة حب جوه عينيكي
تغسلني النسمة اللي في نيلك
أعزف كل حروفك واغنيّلك
وتكوني الحارة والشارع وأخطي
من بحري لشطّي
يكتب خطي ..
ما زلت أحبك سيدتي آلاف المرات
ما زلت أحبك سيدتي رغم الأزمات
ما زلت أحبك وأحبك وأحبك وأحبك
في الماضي وفي الحاضر والمستقبل
وأحبك يا سيدتي في كل الأوقات
بحبك يا إيزيس
والتوقيع ... أوزوريس
        ***